சுவையான சீரக மீன் குழம்பு செய்முறை

இந்த சீரக மீன் குழம்பு மிகவும் சுவையாக இருக்கும். செய்வதும் மிகவும் எளிமையானது. இதை எப்படி செய்வது என்று பார்க்கலாம்.

தேவையான பொருட்கள்:

மீன் – 500 கிராம்
சின்ன வெங்காயம் – 150 கிராம்
தக்காளி – 150 கிராம்
பச்சை மிளகாய் – 4
பூண்டு – 10 பல்
மிளகாய் தூள் – 2 டீஸ்பூன்
சீரகத்தூள் – 2 டீஸ்பூன்
புளி – சிறிய எலுமிச்சை அளவு
எண்ணெய் – 3 டேபிள்ஸ்பூன்
தேங்காய் விழுது – அரை கப்
உ.பருப்பு, வெந்தயம், சீரகம் – தலா அரை டீஸ்பூன்
கொத்தமல்லி கறிவேப்பிலை – சிறிது

செய்முறை :

* மீனை சுத்தம் செய்து நன்கு கழுவி தண்ணீரை வடிகட்டவும்.

* புளியை நன்றாக கரைத்து கொள்ளவும்.

* சின்ன வெங்காயத்தை தோல் உரித்து பொடியாக நறுக்கி வைக்கவும்

* தக்காளியை பொடியாக நறுக்கி வைக்கவும்.

* வாணலியில் எண்ணெய் விட்டு காய்ந்ததும் சீரகம், உளுத்தம் பருப்பு, வெந்தயம் போட்டு தாளித்த பின் பச்சை மிளகாய், பூண்டு, கறிவேப்பிலை போட்டு வதக்கவும்.

* அத்துடன் வெங்காயத்தை சேர்த்து பொன்னிறமாக வதக்கவும்.

* வெங்காயம் நன்றாக வதங்கியதும் தக்காளி, சிறிது உப்பு சேர்த்து நன்றாக வதக்கவும்.

* தக்காளி நன்றாக மசிந்து தொக்கு பதம் வரும் போது மிளகாய்த்தூள், சீரகத்தூள் சேர்த்து பிரட்டவும்.

* அடுத்து அதில் தேங்காய் விழுது, புளித்தண்ணீர் சேர்த்து நன்றாக கொதிக்க விடவும்.

* குழம்பு கொத்திக்க ஆரம்பித்தவுடன் உப்பு, மீனை சேர்த்து அடுப்பை மிதமான தீயில் வைக்கவும்.

* மீன் வெந்தவுடன் நறுக்கிய கொத்தமல்லி இலை தூவி இறக்கவும்.

* புளிப்பு, காரம் உங்கள் விருப்பம் போல் சேர்த்து கொள்ளலாம்.

* சுவையான சீரக மீன் குழம்பு ரெடி.